إهداء إلى ولاد الشعب لي صابريين وبخييير لـ محمد الشركي

الفنان الساخر: محمد الشركي
وجدة : 13/04/2014

إهداء إلى ولاد الشعب لي صابريين وبخييير

حنا ولاد الشعب لي ماشي منبود
شاكي باكي على الصبح
منبوذ قاليك فالبلاد مقصح
مشافش المنبوذين ديال بالصح
أجي نضربو دورة ونوريك
الناس فبلادي خافيين عليك
حالهم حالة
كاين لي معيشته من الزبالة
لي عايش فمرحاض … ولي عايش فزنكة فوق سطح
لي خرجها الجوع لبواط تشطح
أجي تشوف المنبوذين ديال بالصح
ما بكى ما شكا
عمرو عليك ما تشكا
خدم حتى صحته حفات …
عاش إنعاش حتى مات
فالتقاعد خلاو ليه غير الصرف
يتمنا عزرائيل يزوره بالخف
كاين لي ولدت فباب اسبيطار … كاين لي عقله بقوت الفقصة طار
قاليك منبود
فبلادي يلا كان فراس مالك بيت وكوزينة راك محضوض
يلا كان فراس مالك ثلاجة وتلفزة راك عايش فالوجود
أجي تشوف
لي فراس ماله حصيرة
لي مضوي بالشمع وعايش فحيرة
أجي تشوف
ناس عايشة فالجبال
وناس عيشتها تنوض لهبال
أجي تشوف
ناس جاريين عليهم لمخازنية … فالجوطية صباح وعشية
أجي تشوف
الحراكة وناس الزوضياك
ناس تقلب على رموك تحتو تتخبع
بنادم كحل بقوت لوسخ يخلع
بنادم ما لاقي حتى ثمان الحمام
يطلب كل يوم ثمن لقمة طعام

اجي تشوف
درية صغيرة عمرها سبع سنين مرمية من دار لدار
يتيم جرا عليه مول لكرا بالليل قبل النهار
أطفال صغار موسدين الطروطوار
أجي تشوف
بنادم لي بالصح مكشوف
أنت ولد المال والعاقاة
مع المنبوذين ما عندك علاقة
عمرك مديت يديك ولا طلبت صداقة
ولكن … دوماج
أكتب ونوض لعجاج
أطلب وطالب تبان فالتلفزة
أنت من بكري قاضي حاجة
حنا … لينا ربي … حامدين الله
حنا 30 مليون من ولاد الشعب المنسي
النص عريان وقليل لي مكسي
حنا 30 مليون من ولاد الشعب المنسي
النص جيعان وقليل لي بايت معشي
حنا ولاد الشعب لي ماشي منبود
ما نبكيو … ما نشكيو .. ما منتجاوزو الحدود
حيت عارفين بلي حقنا عند الله محفوظ
الفنان الساخر: محمد الشركي
وجدة : 13/04/2014